1 Corinthians 11

1Sakini, mihelisungein sakien keil onak, hesuval koa inau namul nalisungein sakien keil onen Iesu. a

Hihiseien usil Sakien onen Kristin Keil Navong Alah Ruai keke Avaha Netan min Ahi

2Namasmas kami veni, lisenges, mimundem kat inau ka mimusil hihiseien keil koa nasani min kami. 3Ka ekvati keke kami mivailea keke Iesu vi avat onen meahos vasi keil, meahos tai vi avat onen ahin onen, b ka Ahi vi avat onen Iesu. 4Sakini, munak meatin tai mul vis vuo vit luvat selusien onen Ahi en meten meatin keil ka mul kav koe vatin, kei rie lati keke mul san memouen ven avat onen koa vi Kristo. 5Ka munak ahin tai mul vis vuo vit luvat selusien onen Ahi en meten meatin keil ka rokav koetei vatin, en sakien orer, kei mul rie lati keke mul san memouen ven avat onen koa vi meatin onen. Sakien enek suval memouen koa ahin kuri navong asev en vatin.
11:5 Navong avotini keke ahin tai mul mum tisa ral min meatin keil, asev en vatin keke hememou en meten meatin keil.
6Ka munak ahin tai enrovattei vav koe vatin, mal keke isev en vatin. Ka veni vi memouen keke asev en vatin ahin tai, hetahos imok keke heav koe vatin en kaliko tai. 7Meahos keil, mal keke anav koetei vatie veni akur suvalien onen Ahi ka amul arie lat hetetamenien onen. d Ka ahin keil, keil amul arie lat hetetamenien onen meatin keil one. 8Veni meahos, Ahi romumontei vaka en ahin, ka mumon ahin ka en meahos. 9Ka Ahi romumontei meahos vakataun ahin, ka mumon ahin vakataun meahos. e 10Sakini, mal keke ahin tai heav koe vatin vatie lati keke meatin onen vi avat onen. Houmon sakien enek vasakin angelo keil isi keil navong iles sakien ten houhouen onen. 11Avaseini mukok, en moulien orer en Iesu, mal keke ahin keil ka meahos keil amum vituai, veni ahin tovuol munak meahos tovuol, ka meahos tovuol munak ahin tovuol. 12Veni en sakien koa Ahi mumon ahin ka en meahos, Ahi mumon meahos ka en ahin navong avasi. Ka tounah vasi koa amul aka ven Ahi.

13Kami milei rahit en usite koanek: ?Mal keke ahin tai hehis min Ahi en meten meatin keil navong rokav koetei vatin? 14Veni, navong roles meahos tai koa hilin tetaveah, rolesi keke romaltei ka vi memouen mini. 15Ka navong ahin, hilin tetaveah, rolesi tahos imok ka rovati lat isen. Veni Ahi san hilin mini vav koe vatin. 16Ka munak etai en kami envati voumon selkututien usil sakien enek koa ahin mul kav koe vatin navong mul vis, navit mahiteni keke sios vasi keil onen Ahi amul amusil sakien enek, navong umai vituai keke uva netan min Ahi, ka komai eiloheh keil mermaentei sakien savsav keil.

Hihiseien usil Sakien koa Amumon Anien Votut Onen Iesu

17Ka en usite ekek, narmasmastei kami eni: navong milah ruai, rovitei ven tounah koa tahos, ka ven tounah koa tisa. 18Mulamu, nalonge keke navong milah ruai, mimul miriti vas kami mivi vangite savsav keil. f Ka navong nalonge, namundemi keke hati selusien teni vi anatin. 19Ka vahesa hetahos keke mimul miriti vas kami mukok keke mihehotin isei keil en kami avi onen Ahi anatin. g 20Navong milah ruai keke mikur Anien Votut onen Asuv, mirmumontei en rendemien keke mivandem Asuv Iesu. 21Veni navong mimumon anien enek, tei en kami akan vasi anien ae mulamu. Ka sakini, tei en kami amai kat keil veah, ka teisav emun amunmun vini keil. 22?Mukave? ?Teim onami tovuol keke mivanian ka mimunmun ien? ?Vensa mimul mipurun Sios onen Ahi ka misakin koakeil tounah one havivi amemou? ?Mimundemi mivit mahiten sa min kami ven sakien koanik? ?Mamasmas kami? !Vuo, nasakras!

23Hihiseien usil Anien Votut enek koa nasani min kami, nakuri ven Asuv Iesu keke en vongien koa asa lat moulien onen, kei kur veret tai. h 24Ka navong san masmasien min Ahi veni, kum vahasi ka viteni vit, “Koanik vi avek koa nasani min kami. Mihoumoni hemukonek keke mihendem usil nau.” 25En vati sakien enek, navong akanian evus, Iesu kur veiuaen ka viteni vit, “Uaen koanik vi rak vasakin hatkatien hau onen Ahi vakeih ka vamai vahi anatin. i Mihoumoni hemukonek keke mihendem usil nau.” 26Sakini, hetokol avong koa Iesu hemai ris eni, en avong vasi koa mikan veret koanik ka mimun uaen enek mimul mivitehiteni keke Asuv mat vinat meatin keil.

27Sakini, munak meatin etai kan veret vuo mun uaen en Anien Votut onen Asuv Iesu en sakien koa romaltei, kei hekur mahien veni mul mumon tisaen vakat aven Iesu ka ran. j 28Sakini, helamu en avong koa mihean veret ka mihemun uaen koanik, kami vasi mihendem usil aneite teni ka mihelei rahit moulien onami. 29Veni munak mikan veret ka mimun uaen en sakien tai koa mul purun meatin sav keil koa avi aven Asuv, k mimul mileh mahien onen Ahi emai en kami. 30Ven sakien onami enek, houlu en kami amesai ka ave memerau, ka tei en kami umat. 31Ka vahit rovalei rahit moulien orer valamu, mahien onen Ahi varmaitei en ir. 32Ka navong Ahi san mahien minir kosa, mumoni vatalimal enir. Veni navong romai romal eris en meten, reherkurtei mun mahien en Avong Ekor navong hesan mahien min meatin keil en out netan. l

33Sakini, tuak ka ahinkuli keil en demkatien, navong milah ruai keke mivan Anien Votut onen Asuv, mihetosin teisav keil keke mivatiti anien ami. 34Ka munak amai kat kami, miheanian en teim onami helamu. Hesakini, navong milah ruai, miherlehtei mahien onen Ahi hemai en kami. Ka en usite ten tounah sav keil, nihisein kami eni navong nimai.

Copyright information for PMA